Que é unha agrupación de xestión conxunta?

As persoas propietarias ou titulares de dereitos de aproveitamento de terreos agroforestais que pretendan unha xestión común dos ditos terreos poderán solicitar o seu recoñecemento como agrupación forestal ou agrogandeira de xestión conxunta, segundo a finalidade principal da agrupación.

Que son as agrupacións de xestión conxunta?

As agrupacións de xestión conxunta terán por finalidade xestionar de forma conxunta e sustentable os terreos agroforestais integrados no perímetro de actuación co fin de, explotalos, recuperalos e pólos en valor, previndo e impedindo o seu abandono.

Tamén favorecerán a produción e comercialización conxunta, o uso en común dos medios para a realización de actividades agrarias e servirán como instrumento para a protección do ambiente, a prevención e defensa contra os incendios forestais, a protección fronte a catástrofes e a mitigación e adaptación contra o cambio climático.

Asimesmo crearán emprego endóxeno, colaborando no aumento da calidade de vida e nas expectativas de desenvolvemento da poboación rural e axudarán á transferencia de coñecemento e a introdución de prácticas innovadoras no medio rural.

As agrupacións forestais de xestión conxunta regúlanse pola Lei 7/2012, de 28 de xuño de montes de Galicia.  As solicitudes das persoas interesadas que pretendan o recoñecemento de  agrupación forestal de xestión conxunta deberán presentar súa solicitude na sede electrónica Xunta de Galicia, procedemento: MR608B - Recoñecemento de agrupación forestal de xestión conxunta.

Para as demáis agrupacións de xestión conxunta, poderá facerse a solicitude a través do procedemento PR004A - Presentación electrónica de solicitudes, escritos e comunicacións que non conten cun sistema electrónico específico nin cun modelo electrónico normalizado.

Quen pode solicitalo?

Poderán solicitar o recoñecemento como agrupacións de xestión conxunta as seguintes entidades cuxa actividade se desenvolva en terreos agroforestais no ámbito territorial da Comunidade Autónoma de Galicia:

• Asociacións sen ánimo de lucro constituídas para o auxilio, apoio e asesoramento ás persoas propietarias ou titulares dos dereitos de aproveitamento de terreos na planificación da xestión agroforestal e na xestión e comercialización conxunta dos seus aproveitamentos, sempre que estean compostas por persoas titulares dos indicados dereitos dentro da Comunidade Autónoma de Galicia.
• Sociedades civís e comunidades de bens.
• Cooperativas e outras entidades de economía social.
• Sociedades agrarias de transformación.
• Sociedades mercantís reguladas na lexislación de sociedades de capital.
• Sociedades de fomento forestal, para o caso de agrupacións de xestión conxunta forestal.
• Calquera outra que teña por obxecto a recuperación, de forma conxunta, de terras agroforestais

Requisitos das agrupacións agrogandeiras de xestión conxunta

1. As agrupacións agrogandeiras de xestión conxunta deberán dispor da xestión dunha superficie mínima de 10 hectáreas.
2. As persoas ou entidades que forman parte da agrupación agrogandeira deberán asinar un compromiso de pertenza e de cesión ou delegación da xestión á agrupación durante o tempo previsto de vixencia da actuación.
3. As agrupacións agrogandeiras poderán asinar acordos de cesión coas persoas titulares de terreos agrogandeiros para o uso e o aproveitamento dos predios destes últimos mediante calquera negocio xurídico válido en dereito, e non será necesaria a súa integración como socios na dita agrupación. Estes acordos incluirán expresamente a obriga da persoa cesionaria de cumprir cos prazos de cesión dispostos neste artigo.
4. Os estatutos da agrupación de xestión conxunta recollerán, sempre que pola súa natureza mercantil lles sexan aplicables, entre outras, as seguintes previsións:
   
   1. A maioría dos dereitos de voto deberá ser exercida polas persoas socias que acheguen a propiedade ou os dereitos de uso de parcelas agrogandeiras.
   2. Os dereitos económicos das persoas membros da agrupación. Para tales efectos, de ser o caso, os estatutos sociais poderán prever a posibilidade de que cada participación ou acción social implique unha diferente participación nos beneficios da sociedade.
   3. A obrigatoriedade de que, en caso de obtención de resultados positivos no exercicio económico pola entidade, se proceda á distribución dun beneficio mínimo, cunha porcentaxe sobre o resultado do exercicio ou cos criterios obxectivos para a súa determinación que para tales efectos se fixen nos estatutos.

Normativa de referencia

Lei 11/2021, do 14 de maio, de recuperación da terra agraria de Galicia

Lei 7/2012, de 28 de xuño de montes de Galicia