Plan anual de actuacións para a recuperación da terra agraria de Galicia 2025

En base ao artigo 7.2. da Lei 11/2021, do 14 de maio, de recuperación da terra agraria de Galicia; a Axencia Galega de Desenvolvemento Rural elaborou un plan de acción anual das actuacións en materia de recuperación agraria.

Este Plan de actuación ten como propósito avanzar na consecución dos obxectivos da Lei de recuperación, que inclúen a xestión da terra agroforestal, a ordenación dos seus usos, a loita contra o seu abandono e o fomento da súa recuperación. Con este fin establécense os seguintes obxectivos específicos:

  • Obxectivo 1: Asegurar o axeitado desenvolvemento das funcións da Axencia Galega de Desenvolvemento Rural relacionadas coa recuperación da terra agraria de Galicia.
  • Obxectivo 2: Planificar os usos das terras agroforestais para garantir unha xestión eficiente das terras agrarias dende un punto de vista económico, social e ambiental.
  • Obxectivo 3: Facilitar a mobilización de terra para uso agroforestal mediante a posta en contacto das persoas propietarias ou titulares dos dereitos de uso ou aproveitamento das terras coas persoas que demandan terras, fomentando os arrendamentos a través do Banco de Terras de Galicia e as permutas de especial interese agrario.
  • Obxectivo 4: Promover a posta en produción das terras agroforestais de Galicia impulsando instrumentos de mobilización e recuperación da terra agraria.
  • Obxectivo 5: Fomentar a recuperación da terra agraria a través de medidas financeiras de incentivo que terán por obxecto apoiar os investimentos requiridos polos instrumentos de mobilización e recuperación da terra agraria.

 

Plan anual 2025

Os obxectivos do Plan concrétanse en cinco eixes estratéxicos divididos en propostas de actuación a desenvolver no ano 2025 en base aos traballos xa executados entre os anos 2020 e 2024.

Os eixes estratéxicos de actuación para o ano 2025 son os seguintes:

  • Eixe 1: Organización administrativa
  • Eixe 2: Planificación de usos agroforestais
  • Eixe 3: Procedementos e instrumentos de mobilización de terras
  • Eixe 4: Actuacións e instrumentos de recuperación de terras
  • Eixe 5: Medidas de fomento

Novas relacionadas

Ver todas

polígono agroforestal de Cualedro
Novas 28 Abr 2025
Medio Rural saca a concorrencia competitiva as parcelas do polígono agroforestal de Cualedro

O Diario Oficial de Galicia publica hoxe a aprobación desta figura contemplada na Lei de recuperación da terra agraria, que abrangue unha superficie de 64 hectáreas, distribuídas en 72 parcelas de 70 titulares catastrais. A actividade principal será a gandaría en extensivo e cultivos complementarios á explotación, á que se lle poderá engadir o cultivo agrícola e a plantación de árbores para a obtención de froito. Este é un dos 34 polígonos agroforestais en marcha na nosa comunidade, que supoñen a posta en valor de máis de 9.500 hectáreas distribuídas en preto de 31.600 parcelas propiedade de 9.220 veciños.

A Xunta porá en funcionamento esta semana o Banco de explotacións
Novas 10 Feb 2025
A Xunta porá en funcionamento esta semana o Banco de explotacións para favorecer a remuda no agro galego

Rueda salienta que o obxectivo é “facilitar a transmisión de case 140 explotacións” ata 2026. Trátase dunha plataforma para poñer en contacto aos propietarios que deixan unha explotación e a cidadáns interesados en poñerse ao fronte. O presidente destaca que contará “cun visor público” que “permitirá localizar e visualizar as características” dos negocios inscritos no Banco. O Goberno autonómico tamén destinará 2,1 M€ a unha nova liña de axudas para promover a continuidade das explotacións viables mediante a transmisión. O proceso de transmisión de explotacións estará tutelado pola Administración autonómica, a través da rede de oficinas rurais, de forma que calquera persoa interesada poderá dirixirse á súa oficina para informarse sobre este tema e recibir asesoramento.

A Xunta destaca o papel dos polígonos agroforestais
Novas 15 Xan 2025
A Xunta destaca o papel dos polígonos agroforestais como instrumentos para facer un rural rendible mediante a recuperación de terras

A conselleira do Medio Rural, María José Gómez, visitou esta tarde o polígono agroforestal de Sabadelle, situado neste municipio lucense e que permitirá a posta en valor de 38,68 hectáreas de terreo, distribuídas en 114 parcelas de 80 propietarios. Subliñou que neste caso cobra especial relevancia, como elemento dinamizador, o gando en extensivo, que tamén desempeña un labor socio-ambiental e de prevención de incendios que cómpre ter en conta. En toda Galicia existen actualmente 34 polígonos agroforestais (seis deles na provincia de Lugo), cunha superficie mobilizada de máis de 9.500 hectáreas, distribuídas en 9.200 parcelas de case 31.600 propietarios.

Medio Rural pon en valor as ferramentas de mobilización de terras na aldea de Meixide
Novas 17 Nov 2024
Medio Rural pon en valor as ferramentas de mobilización de terras na aldea de Meixide, situada no concello ourensán da Veiga

A directora xeral da Axencia Galega de Desenvolvemento Rural visitou esta aldea modelo na que se mobilizaron 76,85 hectáreas divididas en 646 parcelas de 151 titulares catastrais. Un total de 61,6 hectáreas están arrendadas a través do Banco de Terras por un gandeiro local cunha explotación de gando vacún en extensivo de razas autóctonas de produción ecolóxica.