A Xunta ten aberto un proceso selectivo cun orzamento de máis de 3,5 M€ para a contratación dos traballos incluídos nos estudos de viabilidade dos polígonos agroforestais

A Xunta ten aberto un proceso selectivo
Novas
28 Aug 2023

A Consellería do Medio Rural, a través da Axencia Galega de Desenvolvemento Rural, ten aberto un proceso selectivo para a contratación dos traballos incluídos nos estudos de viabilidade dos polígonos agroforestais. Este acordo marco conta cun orzamento estimado de máis de 3,5 millóns de euros, cofinanciado co Fondo Europeo Agrícola de Desenvolvemento Rural enmarcado no PDR de Galicia 2014-2020 e no Plan Estratéxico da PAC 2023-2027 de España (PEPAC).

O procedemento deste acordo marco pretende seleccionar a un máximo de 10 empresas co fin de que realicen traballos de carácter técnico e xurídico para o apoio aos servizos técnicos e medio propios da Axencia Galega de Desenvolvemento Rural. En concreto, os labores centraranse naqueles necesarios para a posta en marcha dos polígonos agroforestais e que se atopan recollidos na Lei de Recuperación da Terra Agraria de Galicia.

Entre as funcións específicas das empresas seleccionadas estarían a elaboración do documento do estudo de viabilidade dos polígonos agroforestais, no que se inclúen, entre outras cousas, a identificación de usos e actividades admisibles no polígono e a análise dos prezos de referencia, das superficies mínimas e da vida útil do polígono; a tramitación ambiental; a prospección arqueolóxica no caso de ser precisa; a revisión do parcelario, para a comprobación sobre o terreo da precisión do parcelario existente e, de ser necesario, a execución dun levantamento topográfico complementario; a investigación da titularidade das parcelas; ou a recollida dos compromisos de adhesión ao polígono.

Mediante o procedemento de contratación iniciado preténdese gañar en axilidade na posta en marcha dos polígonos agroforestais, ao dispoñer de apoio técnico no desenvolvemento dos traballos segundo as distintas fases nas que se atopan os polígonos agroforestais nos que se está a traballar dende a Consellería do Medio Rural .

As empresas interesadas teñen ata o vindeiro venres 8 de setembro para presentar a súa solicitude. Toda a información sobre a documentación do procedemento pode atoparse na plataforma de contratos públicos da Xunta de Galicia.

 

Enlace ao procedemento: https://www.contratosdegalicia.gal/licitacion?OP=50&N=820035&lang=gl

 

Novas relacionadas

Ver todas

polígono agroforestal da Madanela
Novas 13 Mai 2024
A Xunta declara de utilidade pública e interese social o polígono agroforestal da Madanela, no concello ourensán de Monterrei, para mobilizar máis terra agraria

O Diario Oficial de Galicia publica hoxe o decreto desta declaración, que implica o recoñecemento da existencia de razóns de interese público para os efectos da aplicación da tramitación de urxencia do procedemento. No referido á orientación produtiva deste novo polígono, entre as actividades previstas está a gandaría en extensivo, enmarcándose na aposta da Xunta por prever os incendios forestais a través da xestión do territorio. Dentro da aposta por impulsar estas figuras incluídas na Lei de recuperación da terra agraria, nos últimos catro meses foron declarados un total de oito, ascendendo xa a 34 os polígonos aprobados en Galicia para mobilizar en total máis de 9.500 hectáreas.

A Xunta aposta pola recuperación do territorio
Novas 10 Mai 2024
A Xunta salienta a súa aposta pola recuperación do territorio para dinamizar o rural no encontro de Sober

A directora xeral da Axencia Galega de Desenvolvemento Rural, Inés Santé, participou esta mañá neste evento, un foro económico centrado no rural galego que comezou onte e que rematará hoxe nesta localidade lucense. Santé, que participou na mesa redonda sobre Recuperación, desenvolvemento e emprendemento no ámbito rural, salientou algunha das iniciativas que está a levar a cabo a Consellería do Medio Rural neste eido. Así, destacou os resultados acadados a través do programa Leader executado en colaboración cos 24 Grupos de Desenvolvemento Rural (GDR) que están espallados por toda a comunidade autónoma.

A Xunta abre o prazo para arrendar parcelas a través do Banco de Terras de Galicia
Novas 05 Mai 2024
A Xunta abre o prazo para arrendar parcelas a través do Banco de Terras de Galicia

Como novidade, trala publicación do Real Decreto 1177/2023, os responsables das explotacións que participen en programas de reestruturación, como é o Banco de Terras, poderán acceder aos dereitos da axuda básica á renda da reserva nacional. Esta medida poderá beneficiar aos arrendatarios das 2.469 hectáreas arrendadas ou que se atopan en proceso de concretalo, aos que se suman outras 1.255 que están dispoñibles para aproveitamentos agrícolas ou pecuarios. O Banco de Terras de Galicia é un instrumento creado pola Consellería do Medio Rural co dobre obxectivo de evitar o abandono da terra agraria e de poñela a disposición de todas aquelas persoas que a necesiten.

dinamización do rural galego mediante a innovación
Novas 25 Abr 2024
A Xunta destaca as ferramentas da Lei de recuperación da terra agraria como factores clave para a dinamización do rural galego mediante a innovación

A directora xeral da Axencia Galega de Desenvolvemento Rural, Inés Santé, participou este mediodía en San Xoán de Río na clausura da xornada “Está Ourense preparada para atraer o novo movemento ruralista?”, organizada por “Ourense Rural é vida”. Na súa intervención, fixo especial fincapé nas aldeas modelo e nos seus plans de dinamización como exemplo para impulsar un deseño xeral de rexeneración dos núcleos rurais. Subliñou que a Xunta impulsa “Aldeas Intelixentes, Solucións de futuro para aldeas sostibles” como proxecto de compra pública de innovación na procura de solucións tecnolóxicas para mellorar os recursos agrarios e a xeración de actividade económica.