Medio Rural publica no DOG a proposta de aprobación do proxecto básico do polígono agroforestal de Cualedro

A Consellería do Medio Rural publica hoxe no Diario Oficial de Galicia a proposta de aprobación do proxecto básico do polígono agroforestal de Cualedro, na provincia de Ourense, documento que inclúe o estudo de viabilidade, revisión do parcelario, delimitación de exclusións, investigación da titularidade e compromisos de adhesión ao proxecto. Esta iniciativa, desenvolvida ao abeiro da Lei de recuperación da terra agraria de Galicia, abrangue unha superficie final de 63,71 hectáreas, distribuídas en 71 parcelas de 115 propietarios.

Este polígono agroforestal terá como actividade principal para a maior parte da súa superficie a gandaría en extensivo e para a restante, unha explotación mixta de gandaría en extensivo e cultivos complementarios ao aproveitamento silvopascícola dos terreos, mentres que como actividades secundarias establece os cultivos agrícolas e o mantemento de vexetación ripícola e plantación de árbores para a obtención de froito. O de Cualedro é un dos 34 polígonos agroforestais -21 deles na provincia de Ourense- en marcha na nosa comunidade, que supoñen a posta en valor de máis de 9.500 hectáreas distribuídas en preto de 31.600 parcelas propiedade de 9.220 veciños.

A maiores dos polígonos agroforestais, a Lei de recuperación da terra agraria conta con outros instrumentos de mobilización como as aldeas modelo, as agrupacións forestais de xestión conxunta e as permutas de especial interese agrario. Ademais, a estas ferramentas súmanse as reestruturacións e concentracións parcelarias, das cales se axilizarán os procesos, que chegan a máis de 100.000 hectáreas no conxunto de Galicia.

Ligazón á publicación no DOG:
https://www.xunta.gal/dog/Publicados/2024/20240927/AnuncioO90-170924-00…